8-март – Эл аралык Аялдардын күнүнө карата

» 8-март – Эл аралык Аялдардын күнүнө карата «Грация Миссис – 2024» сулуулук конкурсунун жеңүүчүсү, география сабагынын мугалими Эсенамонова Ырыскуль Мамбетжумаевна кесиптештерине атайын мастер-класс уюштурду. Иш-чаранын негизги максаты – айымдардын сулуулугуна жана өзүнө болгон ишенимине кам көрүү, ошондой эле мугалимдерди күнүмдүк түйшүктөрдөн бир аз алаксытып, өзүнө убакыт бөлүүгө үндөө болду.

Мастер-класста Ырыскуль Мамбетжумаевна бет терисин туура тазалоо, аны азыктандыруу жана табигый сулуулукту сактоо боюнча пайдалуу кеңештерин бөлүштү. Албетте, мугалимдик кесип көп эмгекти жана убакытты талап кылат, андыктан өзүнө кам көрүү көбүнчө экинчи планга жылып кетет. Ушул себептен ал кесиптештерине сулуулук – бул өзүңө болгон сүйүүнүн жана камкордуктун бир бөлүгү экенин эскертип өттү
Иш-чарага катышкан мугалимдер мастер-класстан көптөгөн пайдалуу маалыматтарды алышты. Алар Ырыскуль Мамбетжумаевнага ыраазычылыктарын билдирип, мындай иш-чаралар көбүрөөк өткөрүлсө жакшы болоорун белгилешти.
«Биз окуучуларга сапаттуу билим берүү үчүн ар дайым аракет кылабыз, бирок өзүбүзгө да кам көрүүнү унутпашыбыз керек. Ырыскуль эжебиздин мастер-классы биз үчүн абдан пайдалуу болду», – деп бөлүштү катышуучулардын бири.

Сулуулук жана билим – бул ажырагыс нерселер. Ырыскуль Мамбетжумаевна мугалимдик кесипти ардактоо менен бирге, өзүнө кам көрүүнүн жана өзүн-өзү баалоонун маанилүүлүгүн көрсөтүп, кесиптештерине өрнөк боло алды.